blogyann

liorzh-anien

Pa oan o labourat e oa ma lec'h-labour e-kichen liorzh Citroen e Pariz XVvet. Treset  e oa bet al liorzh-se gant Gilles Clement , anezhañ a-du liorzhoù-anien. Savet en deus ar paotr-se ul liorzh all diwar ur fraost, ur pemzek vloazh bennak dezhañ, e departamant ar c'hCreuse.  'M eus ket bet chañs o welet anezhañ c'hoazh. Lod mat eus plant ar fraost zo bet miret gantañ, emezañ,  ha lakaet en o zouesk plantennoù all diouzh e awen.

Plijout a rae din mont da bourmen e liorzh Citroen. En ur c'horn eus ar park zo bet savet seizh liorzhig a zo bep a arouez un deiz eus ar sizhun. Adkavet 'm eus skeudenn unan anezho. Marteze hini al lun (al loar) gant e livioù arc'hant.

Un nebeud bloavezhioù zo, on bet e Bro Greta, en nevez-amzer, bleunioù tout ar vro. Hag e pep lec'h liorzhoù mod "Clement" savet gant an natur he-unan.

Lavaret a rae Homer e oa ar "Champs-Elysées" goloet gant milad. Amañ da heul, e Bro Greta c'hoazh, emañ ar re-se o sevel o c'horzennoù  hag int abafet evel an anaon zo o tremen eno.

...

 

E Bro Danmark 'm eus gwelet ar jenevreg-mañ, ur "fraost" na vije netra da gemm enni... (un tamm teñval ar skeudenn siwazh)

 

spered er skalieroù

Dec'h da noz hor boa gwellet interview Sarkozy gant Alain Duhamel war an TV. Lakaet en doa ma mab ac'hanon da verzout pegen prim ha berr, ha klok memestra, e teue respontoù paotr e zent hir a droc'h ar voketenn.

Setu arabat da spered an den dont er skalieroù (eus pelec'h 'ta e teu an dro-lavar drol-se ?) mar fell dezhañ politika ! Met bezañ e spered er skalieroù a c'hell dilañs an den en e vicher ivez hag en e vuhez a-bezh. Ha me a zeu ma spered eno meur a wezh. Ret eo bet ober ganti.

Klevet em boa ur c'honter eus Breizh o lavaret : "ret eo d'an den deskiñ da dennañ e vad eus e duioù-gwan". Kentañ wezh e teu d'am spered ar gomz fur-se da geñver ar gudenn-mañ. Pa lavaran deoc'h emañ ma spered er skalieroù.

Emañ Yann (Mael), ur miz dezhañ, o tont ...

... da weladenniñ e dud kozh hag en em gavout gant e eontr, joa ganto.

Setu goustlet an dibenn-sizhun d'ar familh !

Neizh gwesped

N'ho pez ket aon ! N'eo ket eus politik pe (v)business an hini emaon o vont da gomz. Un neizh gwesped gwirion an hini eo a zo el liorzh, dirak an ti. Dindan douar emañ. Kavout a rae din e oa un toull logod bennak. Betek ma 'm eus merzet edo gwesped o tonemoned. Pellgomzet em eus da baotred an tan. Lavaret eo bet din ganto na raent ket war dro an dra-se ken. Setu me o kas un email d'un embregerezh a zo he micher kas da get al loened hag an amprevaned n'int ket degemeret mat en hor c'hichen. Respont ebet. Re zister an draig emichañs. Ha me o vont war ar rouedad da c'houlenn gant Google. Tud zo e Bro gKebek hag o deus skrivet an doare. E-touesk o alioù, unan fur : gortoz betek ar goañv hag e vo marv ar preñvaned. Pe en o c'housk ? N'em eus ket dalc'het soñj. Gwelet e vo. Skos ur wezenn zo o vreinañ eno dindan al letonenn. Donik e c'hellfe bezañ. Ha n'eo ket ken yen ar goañv e-kichen Pariz hag e Bro gKebek :-)

Perak 'ta deskiñ Daneg ?

Dalc'het e oa dec'h da noz ur forum diwar-benn Daneg e Ti Bro Danmark e Pariz.

Peseurt peragoù a zegas tud zo da zeskiñ yezh ar vro vihan-se ?

Da veno ar paotr a gase an emvod en dro : karantez pe vicher. Karantez evit un Danad/ez (me eo !).
Pe c'hoant da implij ar yezh evit mad e vicher.

Goulennet e oa bet d'ar saliad. Hag eo deut peragoù all.

Ur paotr a oa bet un 40 vloaz bennak zo o studiañ keramik e Bornholm. Ha setu eñ dedennet gant ar yezh.

Unan all a oa deuet da vezañ sot gant Andersen, paotr ar Vari-vorgan(... ig), ha desket ar yezh abalamour da se.

Eur plac'h, hag a oa eus Bro Normandi, a oa c'hoant ganti da adkavout he gwriziennoù wiking !  Ken brav ha gwriziennoù keltiek, goude holl !

Bez edo Claude Hagege, yezhoniour brudet anezhañ, er sal ivez (incognito betek e emelloù 'm eus kavet un tamm taer a-wezhioù siwazh !). Ur bern yezhoù a oar ar paotr-se. Desket en doa Daneg a-benn lenn ul levr gant ur yezhoniour danad ha ne oa ket bet troet d'ur yezh all.

Hag ar grennarded ?

Respontet eo bet gant ar plac'h a ra war-dro kelennerezh Daneg e lise Lamartine.
2/3 eus he skolidi, hervezi, a zo Danad/ez unan eus o zud (evel hor mibien-ni).
Un hanter eus ar re all a zo un Danad/ez en o lignez ha c'hoant ganto adkavout o gwriziennoù.
Ar peurrest a zo dedennet gant sevenadur ar vro. Tremenet int e-biou dezhañ, dre zegouezh, da-geñver un abadenn bennak en TV, pe vod-all. Hag o deus soñjet e oa traoù talvoudus da gavout eno.