Eus Breizh on

Kavet ur romant danek ganin hag a zibun e steuñvenn e Breizh.

"Den kloge jomfru" gant Lis Vibeke Kristensen. Etre meur a soñj  e choman evit treiñ an titl-se. Pe "speredek" pe "fur" evit "kloge". Pe "plac'h" pe "gwerc'hez" evit "jomfru". Setu-me o chom etre peder zroidigezh ! Pa 'm bo lennet muioc'h eus al levr e c'hellin divizout marteze.
Karantez a zegouezh etre Yann, deuet da zeskiñ e vicher ostiz hotel e restaorant e eontr e Paris, ha Nana deuet da vezañ "jeune fille au pair" evit tec'hiñ diouzh e familh e Bro Danmark.
Lenn a ran er skrid-diverrañ ez aint o-daou da Vreizh. Yann a yelo da soudard e Bro an Aljeria, hag eñ lazhet eno. Chom a raio Nana e Breizh ha delc'her he-unan hotel ar familh. Setu he buhez-hi oc'h ober al lodenn vras eus ar romant.
Un arroudennadig 'm eus kavet fentus. Pa lavar Nana da Yann ez eo-hi Danadez e c'hoarzh daoulagad hemañ hag e respont :
"Viking. Eveldon !"
ha neuze, "c'hwezet" an tamm anezhañ, evel pa vefe o tisplegañ holl :
"Eus Breizh on"

Comments

[Rédigé par:Ingivaldur]

Fin eo ar plac'h, marteze, kentoc'h eget fur pe speredek... Ul levr dedennus, war a seblant. Vikinged ha Breizhiz...

[Rédigé par:Ingivaldur]

...pe an dimezell fin, evit treiñ den kloge jomfru!

[Rédigé par:yann]

Trugarez deoc'h.
Gwelet em boa em geriadur "gyldendal": klog adj. intelligent; sage, sensé, prudent, avisé, circonspect
setu e oan chomet etre "speredek" ha "fur".
War a lennan e Favereau e talv "fin" kement ha "futé, malin" kentoc'h

Met ur gudenn all zo. Daoust dezhi bezañ fur, erru war-dro pajenn 30, n'eo ket dimezell Nana ken, hag hi n'eo ket itron c'hoazh :-)

[Rédigé par:Ingivaldur]

Ya, ar gwir zo gant Gyldendal, e-keñver ar furnez hag all... met setu, fin e vefe kentoc'h ar plac'h, neuze, hervez ar pezh hoc'h eus skrivet, ha n'eo ket dimezell kennebeut. Ur ger a zo heñvel ouzh an hini e daneg a dalv e islandeg ur plac'h skañv, just-awalc'h: frauka, en ur doare mousgoapus eo.

[Rédigé par:yann]

'M eus ket gellet chom hep ober ar c'hoari-ger aes-se ! Aet on re bell ganti, 'm eus aon.
Evit gwir ez eus karantez sirius etre Nana ha Yann. Ha dic'hoarzh e vez doare ar romant.
Emañ bremañ Nana e Breizh o klask plijout da vamm Yann. Komzet e vez un tammig eus brezel Bro Aljeria gant mignoned Yann. Santet e vez ar reuz o tont.
Evit an obererez, anaoudegezh he deus e Breizh hag er Vretoned, a gav din.