Nijadeg an elerc'h

Bet e oan o teuler ur sell d'al loc'h e-kichen al lec'h m'emaon o chom pa vezomp e Bro Danmark. Ringkøbing Fjord e vez graet anezhañ (an "ø" a vez distaget "eu"). Ur seurt karrhent 'm eus kavet, a c'heller mont gantañ dre varc'hhouarn. Da sul d'an abardaez, ne oa den warnañ.

Tremen a ris ebioù d'un ti magañ visoned dilezet.

Manet eo c'hoazh ar c'hawigelloù ma oa serret ar paour-kaezh loened enno.

Ur vroeneg ledan a c'holo ribl al loc'h.

Diwarni e teu ar plouz-to a zo lakaet c'hoazh er c'horn-bro-mañ war doenn meur a di kozh war ar maez ha meur a di vakañsoù nevez.

Spurmantañ a ris elerc'h war neuñv, sioulig. Kentañ gwech din gwelet kement-all bodet asambles.

Darn anezho a gemeras aon ragon. Setu int nijet kuit ! Fromus e oa o gwelet o tibradañ pounner, o divaskell hag o dreid o skeiñ gant an dour !

Re all a oa dispont. Chom a raent difiñv daoust da nijadeg ar gwazi a-zioc'h o fenn.

En tu all d'al loc'h, e porzh kêr Ringkøbing e spurmanter pevar c'horn gwenn al labouradeg Westas, anezhi produerez vrudet rodoù-avel, a vez gwelet meur a hini anezho er gwelva ...

hag ... en dremwell.

Ur pezh mell ti magañ loened ez eus ivez. Chatal pe moc'h ? Gwelet 'vo ... ur wech all.

(An holl albom war Flickr. Da vrasaat al luc'hskeudennoù e Flickr, klikit war ar sin "+" a-us dezho.)

N.B. Distroet e Frañs 'm eus gwelet er skinwel skeudennoù hag a degase soñj din em fourmenadenn. En un abadennig diwar-benn park rannvroadel Ar Briver e veze displeget e vicher gant ur plouz-toer : "ret eo kizellañ ar plouz war an doenn" emezañ. Ur wech all e klemme tud o chom e-kichenn ur park rannvroadel all peogwir e oa re a elerc'h er c'horn-bro. "Debriñ a reont an trevadoù." emezo !