blogyann

hanter c'houllo

Meur a wech on tremenet e-biou d'an ostaleri-se ha me bet dalc'het er-maez gant gwel ar vogedenn fetis a oa e-barzh.
Hiziv, digoumoul an oabl, ez an tre.

Ez an d'am flijadur

Park ha Kastell Plaisir (78) hiziv d'an abardaez. Erru amañ ar gwall amzer eus Breizh. 

Péter les plombs

Un ti-gar mod kozh eo, bet savet 2 gkm eus kêr ha livet a-nevez. Tapet ar c'horn-bro-mañ gant kresk Pariz, hag ar c'harter war ar maez c'hoazh. Grignolajoù nevez a sav e-kichen ul labouradeg kozh bennak. Nevez-flamm eo tren Rannvro Enez Frañs a ra e arsav p'emaon oc'h arruout. Kalzik a dud a ziskenn. Dibuniñ a reont a-dreuz ar blasenn, e-biou d'an davarn, da gaout arsav ar bus. Hag ac'hano d'o "c'hêrioù-kousk" !

Pa vez ar balan en o bleuñv

C'hoarvezet oa ar goñchennig-mañ e fin miz Ebrel – penn kentañ miz Mae. Gant ma c'hoan edon war gae Porzh-Goustan en Alre ...

bar de la tour

Sul beure anezi, aet ma gwreg da Vro Danmark d'ober war dro he mamm, kavet toull an ti ganin (evel ma lavar Sant Jules Gros), e soñjan mont da zijuni en davarn ha prenañ boued war un dro. Setu me gant ma c'harr war-gaout Neauphle, a blij din ar gêrig-se.

Davy's bar

Kontet eo ar goñchennig-mañ gant Charles Handy en e levr "ar vantell-c'hlav c'houllo" (The empty raincoat). Dezhañ e-unan e oa degouezhet.

An davarn gozh

Kozh-Noe an ti. Er grennamzer e oa roet justis amañ. Justis vras, krenn, bihan eo skrivet war ar skritell. Ti ar barner e oa war un dro, paotr eus an noblañs anezhañ, evel ma oa kustum en amzer-se.
Setu deut tud zo, gwechall, dre an nor-mañ da vond d'ar chafot !
An diabarzh a zegas soñj eus ur pub din. Kaer an daol-evañ goad gant he filiri, he zresoù ha rikamanoù mod Breizh. Ha dister peurrest eus ar peadra. Ezhomm e vefe ag ur c'hinklour pe ginklourez a-feson.
Chichant ha yaouank an ostiz. Hag eñ, n'eus ket mall warnañ degemer an arval zo o tont. O varvailhat emañ gant unan all. Gortoz a ran e vefe dibunet e gaozh betek poent ma teurvez d'am c'haout.
Mad ar banne te. N'eo ket seurt a zu an dour diouzhtu evel ma vez servijet e meur a davarn !
Mont a ra ar gaoz en-dro adarre. Goulennet eo gant ur paotr yaouank all abaoe pegeit emañ o chom hep butuniñ.
- Ur miz hanter. Emezañ, goude bezañ sunet e vanne kafe.
Ha ma spered o kantreal un tammig.
D'ur poent e teu doare da vouezh an ostiz bezañ fromet an tamm anezhi :
- Deut eo honnezh da weladenniñ anezhañ meur a wech. Ha setu-hi o chom en e di bremañ ! emezañ
- Laouen on evitañ, ken ez on. Eme an hini all meur a wech. Fall oa ar jeu gantañ abaoe marv e wreg.
- N'ouzon ket hag eo honnezh unan a feson. Met pa emañ o chom en e di, eo sur e plij dezhañ. Eme an ostiz en ur vont da gaout ur plac'h a zo o c'hortoz dirak mekanik ar "Française des jeux"
- Unan a feson ... unan a feson ... met pa vez an den en e dri-ugent vloaz. Eme an arval. Adlavaret a ra se d'e roched hep echuiñ e frasenn
E-keit se eo arru an ostiz dirak ar plac'h. Pokoù dezhi. Ha setu ar mekanik FdJ o vont en-dro. Laviget an dornigelloù pe voutonioù ouzh  he zalbenn gant ar plac'h. Delc'her a ra an daou den yaounk gant o c'haoz. Anv ez eus eus ur c'hrogad sport bennak a vo dizale.
Dont a ray un den pe un daou bried bennak c'hoazh. Ha setu ar gaoz en-dro adarre.
Da c'houde pa dreuzan ar blasenn e welan un davarn all, doare arnevez  dezhi. Leun awalc'h emañ. Ha me a gav din eo laouenn ostiz an hini all. N'eus nemet mignoned eus e bratik.

En ur dremen dre Garaez (ur wech ouzhpenn)

Divizet ganin foetañ bro war zigarez mont da saloñs al levrioù e Karaez, a oa dalc'het an dibenn-sizhun tremenet.
Dedennet eo an dud ken ez int gant an Arvor. Ha me o weladenniñ an Argoad bep wech 'm eus tro d'ober.
Setu, digwener, goude bezañ tremenet e-biou Roazhon e kregan gant un tamm kantreal a-hed ar Menezioù Are. Un 50 km bennak eus ar gêr-se emañ ar runioù kentañ, tro-dro Becherel evit gwir, ma 'm eus lennet ur wech all war ur skritell bennak edo ar c'hêrig-se ha Lokronan bep e penn ar chadennad. An eil e Breizh-Uhel hag egile e Breizh-Izel. Ha bet o-div gwechall lec'h a relijion ha bet graet berzh war industri ar gwiad ganto.

Kemeret penn an hent war-du menez Bel Air ganin, goude bezañ gwelet arouez ur gwel kaer war ar gartenn. Etre Collinée (Koad Linez) ha Moncontour (Monkantour) emañ.

En ur dremen dre St Launeuc, e-kichen Merdrignac, e choman a-sav dedennet gant ar wezenn-ivin gozh-noe e-kichen ar chapel, kaer anezhi ivez.

 

E douar-teil kreizenn kef ar wezenn-gozh e kresk ur wezenn-babu, a vez graet merisier anezhi (e galleg). Keñverit al loch pellgomz ouzh ar c'hef.

Stad en annezidi ar vourc'h gant o gwezenn !
En ur dremen greomp un tammig bruderezh evit levrioù diwar-benn ar gwez e Breizh.

An hini kentañ zo em zi e Paris. Gwelet a ran ez eus re all ha c'hallfe bezañ interesant ivez

 

War lein Bel-Air : ur chapel all, doare dezhi bezañ bet savet en XIXvet kantved. Dilezet an tamm anezhañ. Skeudennoù ebet diganin emañ an serr-noz o tont. Melloù antennoù a freuz kened al lec'h. Kempennet un toull-noz e-barzh mogerioù un ti-feurm. Ur c'haer a wel war ar vro. Emañ an departamant o paouez adplantiñ ur c'hoadig gwez-fav kempennet diouzh stumm ur steredenn, kurunenn war he zro. Diskleriet eo war ur bannell e blij aer fresk ha gleb Breizh d'ar gwez-fav, setu-int unan eus arouezioù ar vro. Ha me bezañ lennet e vez ar bec'h warno gant an adtommañ-hin ! Hag ar gwez-derv-glaz, arouez ar C'hreisteiz anezho, o vezañ en o bleuñv, ma c'hellan lâret, e Breizh !
Ger ebet evit pezh a sell ouzh ar chapel he deus hi-ivez ezhomm braz eus un tamm adkempenn. Anzav a ran ne gavan ket anezhi gwall gaer.
Ha me o vont war-du Monkantour, gant an hent VTT a asant degemer ma c'harr. Da serr-noz, war glask gwele, e foetan kêr, kaer-kenañ anezhi ha hi "petite cité de caractère de Bretagne" evel Becherel ha Lokronan. Leti ebet, na kambr-ostiz. Setu, gant keuz e plegan da 'm  flanedenn. Kemer a ran penn hent Sant-Brieg da c'houlenn bod digant ti-Accor ... ur wech ouzhpenn. (da vezañ kendalc'het)

Siprez an hini eo

Edon o kempenn ar c'haead berr siprez a ziwall hol leurenn diouzh an avel. Un tamm hejañ ha rimiañ d'o bleñchoù da gas an delioù marv kuit ha d'o aveliñ.
A greiz-holl e glevan mouezh ur vaouez o veuliñ frond an « thuya ».  Damsellout a ran. Emañ ur paotr o tremen hebiou gant ar c'harrhent en ul lenn e gazetenn. Hag emañ e wreg o vont d'e heul.
«Met n'eo ket thuya an hini eo, Itron » emezon-me
Treiñ a ra war ma zu, souezhet an tamm anezhi : «Ha petra eo neuze ?»
« Siprez » emezon. Gwelet a ran ar paotr o vousc'hoarzin tra ma respont e wreg :
« Kemend-all eo !»
Sioulaat a ran ar jeu : « Konifer eo an daou evel-just »
Hag hi kontant hag o-daou gant o hent.
Ur pennadig goude, ez eus kerse ganin bezañ troc'het he flijadur dezhi. Met e Breizh ne vefen morse e soñj da blantañ thuya.
Furchal a ran em notennoù-lenn Xavier Grall. Trugarez komputer-chakod ker (benniget e vefe lâret e 101 :-)) :
« testamant an derv, urzh ar siprez» (le testament du chêne, l'ordre du cyprès)
Kevrinus e chom ar gerioù-se evidon. Met ma prederian warno ur wech an amzer ... :-)

Ur bar a oa (pe John Ford e Douarnenez)

(Kendalc'h "d'an tu all d'ar ster")
Pa oa aet kuit an den e respontoù mousfent e chomis ma-unan war ar blasennig. Goude ur pennadig e welis ur paotr all o tont gant unan eus ar straedoù strizh a bign eus an aod. A gamm korvigellek e valee. Pa voe erruet tostoc'h din e veizis e oan o paouez gwelet anezhañ dija. Bruchet e oa ouzh taol-evañ un ostaleri war an aod ma oan bet o klask eñvorennoù ma banne Guiness kentañ enni. Chom a reas a-sav diragon en ur horjellat.
- Amañ e oa ur stal a veze graet "amann hag uioù" anezhi gwechal. Emezon en un diskouez ur stal-gannerezh.
- N'ouzon ket petra a oa eno gwechal, emezañ, met un dra a c'hellan lavaret deoc'h : gwelet a rit ar stal-se ?
Bukañ a ra e viz etrezek ur stal all.
- Ya
- Bez e oa ur bar eno diagent ! Ha gwelet a rit ar stal-all-se c'hoazh ?
- ...
- Ur bar a oa en e lec'h ivez !
Hag eñ gant e hent.