blogyann

Grenen (ar barr)

Monet a ra an dud niverus d'e welet èl ma raont en hor bro evit Beg ar Raz.

Penn pellañ Bro Danmark en hanter-noz eo e-lec'h Penn ar Bed. Traezh a zo e-lec'h gran-maen.

"Grenen" a ra an Daniz anezhañ. Ur ger hag a dalv kement ha "barr ur wezenn".

(Trugarez da Erik Christensen)

Ema ret d'an douristed lezel o c'hirri er parking ur c'hilometr a-raog. Hag int àr droad dre an tevenn hag hed-a-hed d'an draezhenn. Ar re n'o deus ket c'hoant da vale pe n'hellont ket a vez douget en ur seurt bus tennet get un trakteur, a vez graet "morvuzhug"(*) anezhoñ.

(Trugarez da Alan Gore)

E welet steudad ar gerzhourion e soñjan e perc'hindourion. Daniz a ziskouezh bout al lod vrasañ anezhe. "Amañ emañ penn-pellañ hor bro" e soñjont a dra sur a pa raont un tamm arsav àr vegig an draezhenn.

 

(trugarez da milehuset)

Et c'hornad-bro-mañ en-dro da Gêr Skagen, er blevezhioù 1900, e oa tolpet livourion hag a zo daet da voud brudet mat. Lod ag o zaolennoù a zo bet livet àr an draezhenn-mañ. Honnezh en o zouez:

(Krøyer : goubannwel en hañv, trugarez da Mia Felgelson )

Meur a hani ag ar livourion-se a oa bet e Bro-C'hall é klask brud. Hag int ivez e Breizh a oa anavet en o mesk d'ar c'houlz-se. Setu-ni é welet un daolenn bennak ag hor bro-ni, a gostez Cancale, en diskouezadeg mirdi Skagen. N'heller ket o gwelet àr al lec'hienn siwazh.

(*) arenicola marina pe " ver de sable ". Sandormen e daneg.

Paotr e varc'h-houarn

Setu-eñ o tegouezh gant e varc'h-houarn, mall warnañ. E-lec'h kenklañ e velo en e sav, harp ouzh ar voger pe ouzh bord ar ribl, e taol anezhañ war an douar. Ha mont tre diouzhtu en ur redek e-barzh ar varaerezh-saloñs-te. Etre taolioù ar saloñs-te hag ar gweturioù klenk war ar ru, a-hed ar ribl, n'eus plas ebet d'an dud war droad da dremen hep ober ur gammed dreist ar machin.

Dont a ra er-maez en ur redek adarre. Ha mont e-biou ha diouzhtu tre e-barzh ar  Franprix e-kichenn.
Tremen a raio un deg munutenn bennag. Hag un deg bennag a dremenerien ivez. An darn vrasañ anezho a c'horreka o bale, ha neuze ur gammed dreist ar bern houarn ha setu tout. Unan bennag anezho, neuz ar souezh warno, a bar warnomp. Ha ni, diazezet mat en hor c'hadorioù, a chom diseblant : n'eus netra emaomp e soñj ober.

Ur vaouez a zegouezh, a-gevred gand he fried. Chom a ra a-sav ha parañ he daoulagad war bep hini ac'hanomp. Komprenn a ra n'eo kiriek den ac'hanomp. Ha n'eus den e-barzh ar stal.  Setu-hi kuit gant keuz.

Setu matezh ar stal o tont, plac'h yaouank chichant anezhi, ur bladennad ganti war he daouarn. Chom a ra a-sav ur pennadig dirak al luziaj, ha distreiñ da servijañ unan, diluz an hent etrezek ennañ. Dont a ra en-dro koulskoude ha neuze ur gammed kran dreist ar velo brein (ho tigarez Decathlon!)

Pa zifluk ar paotr yaouank er-maez eus ar Franprix, ne daol sell ebet warnomp. E bakad gantañ en e zorn kleiz  e krog en e varc'h gant e zorn all. Hag eñ kuit en ur redek, war-lerc'h ur mignon dezhañ, mall warno o-daou.

War var emañ ar mekaniker

Graet eilennoù d'am alc'hwezioù-ti prim ha prim gant ar mekanik bihan a zo gantañ. N'hall ket dresañ ma alc'hwez karr-tan avat.

- "Kit 'ta da balier Leclerc e Gwened. Eno e c'hallo ma c'heneiler cheñch e grogennig d'hoc'h alc'hwez. Ne vo ket ret eilañ anezhañ." emezañ. "Me n'eus ket ar peadra ganin evit ober se. Goulennet e vez ar servij-se diganin ur wech bennak bemdez koulskoude. Med ne fell ket din postiñ arc'hant er stal ken. E soñj mont war ma leve emaon. 62 vloaz on."

- "En oad-se e oan ivez pa oan aet da retredet", emezon-me

-"War var emaon memestra. Penaos e vo abuset ma amzer ganin pa vin war ma leve? Emaon o soñj e mignoned din: n'eo ket brav dezho a gav din."

- "Ma n'ho peus raktres ebet..." emezon-me.

Troc'het eo ma c'haoz din. An dud a vez o klemm, ne vezont ket o klask ali. Ankouaet an dra-se ganin ur wech ouzhpenn.

- "Bremañ, pa'm bez amzer vak e vezan o velbetat un dra bennag em zi."

Pezh n'eo ket gwall zisheñvel diouzh ar pezh e vez oc'h ober amañ evel-just.

Ha me o lavaret:

- "An den, pa vez o telc'her ar seurt stal, e rank plijout ar mekanik dezhañ".

- "Ur mekaniker on. Desket ar vicher ganin en Aerlu. Setu, aet on dija war ma leve" emezañ en ur mousc'hoarzin. Hag eñv o kontañ din pegen brav e oa dezhañ en Aerlu gant ar beajoù.

- "Gant ar stalig-mañ, n'ho pez ket kalz a amzer vak marteze?"

- "N'eo ket ken fall-se: serriñ a ran pa'm bez c'hoant, gozig. Ret din delc'her kont eus ar stalioù all memestra. Rak n'eo ket forzh peseurt stal a zo amañ er palier. Dibabet int bet."

Paotr e skiant-prenet

War an dachenn berniañ dilerc'hioù emaon war-bouez diskargañ ma dilerc'hioù strud. Teuler a ran ur sell ouzh ar paotr doare dezhañ bezañ e karg eus al lec'h. Anavezout a ran anezhañ. E-karg e oa bet e-pad ur pennad mat e Kêr ..., homañ e kreiz an douaroù. Amañ emaomp war an aod, un deg km bennag ac'hano, e-touez an douristed hag ar "c'holden-retretidi".

- "Anavezout a ran ac'hanoc'h" emezon "C'hwi an hini eo a oa e karg e ..."

- "Ya" emezañ

- "Ha penaoz emañ kont amañ ?"

- "Bravoc'h e oa eno ..."

- "Amañ e vez amsent an dud ?"

- "Ya ! "

- "Setu e oa ezhomm eus un den a skiant-prenet."

- "Ya evel-just"

Impalaeriezh

Perak e vez dichek o emzalc'h er broioù estren gant ar Saozon? (A-hervez. Me n'on ket sur eo gwir an dra-se). Perak e vez prenet kement a draoù ganto ken e vezont dindan dle betek re? "Shopaholic" a vez graet eus se e Saozneg. Perak eo bet Breizh-Veur o vrezeliñ aliesoc'h eget kement bro all e-kerz an hanter gantved diwezhañ ?

Abalamour d'an impalaeriezh, eme Jeremy Paxman, kazetenner er BBC anezhañ. Hag eñv o paouez embann un DVD diwar-benn an impalaeriezh-se. Gwelet ar rann gentañ ganin war ar skinwel. Interesus. Setu prenet an dvd e bemp rann ganin.

Ha levezon an impalaeriezh c'hall war ar C'Hallaoued a-vremañ? Me a garfe e vefe diskouezet ivez

Bec'h d'ar postoù-gouloù !

Diriaou ar sizhun a zeu e vo votadeg e Bro Danmark. Anvet e vo ar Folketing evel ma vez graet eus ar parlamant eno. Setu ma vez lakaet poltredoù eus ar re war ar renk war wel e pep lec'h. E Frañs e vezont peget ouzh mogerioù. Er vro-mañ e vezont staget ouzh ar postoù-gouloù. Emañ an daou-mañ e-kichen aerborzh Kopenhag. Ha gwelet 'm eus re ar plac'h ouzh kasi pep post war ar straed. D'ober un tamm barzhoniezh e ro tro a-wechoù : glaz ha ruz eo livioù an dou du.

Ar minister kentañ an hini a zibab deiziad ar voterezh. Evel e Breizh-Veur. A-greiz-holl e vez kemennet. Ha neuze bec'h d'ar postoù! Da dapout ar re a zo darempred en o zro. Pa ne vez ket plas a-walc'h, koulskoude, e vez lakaet poltredoù eus meur a zen war ar memes post. Red d'an den pignat neuze.

 

Dek ali mat d'an droadeien

Al listenn-mañ zo bet savet gant kevredigezh an droadeien(*) eus Bro-Danmark, studiet ganti ar gwall zarvoudoù maz eus bet lazhet troadeien.

1) Kerzhit gant ribloù an hentoù... Paz eus anezhe.

2) ... Petramant kerzhit gant tuioù kleiz an hentoù.

3) Un tamm fluo pe ur c'houlaouenn a vo ganeoc'h pa vezo teñval.

4) Arabat mont a-drek ar gweturajoù o vont war a-dreñv.

5) Arabat dont war an hentoù ken na vo aet kuit ar busoù.

6) Bezit war evezh en treuzennoù-troadeg.

7) Diwallit ouzh ar c'hirri-boutin hag ouzh ar c'hirri-samm dreist-holl.

8) Arabat dont war an hentoù d'ar red.

9) Mard oc'h senior emaoc'h muioc'h war var.

10) Deskit reolennoù an tremenerezh d'ho pugale. Bezit c'hwi hoc'h-unan ur skouer vat.

E Bro-Danmark e ra ar re zo war o leve 1/3 eus ar re lazhet. 66% eus ar gwall zarvoudoù a zegouezh en hanter-vloaz ar goañv.

(*) ar re a ya war droad.

E Bro Danmark adarre

E Bro Danmark, e-kreiz an tevennoù, emaomp adarre, ma gwreg ha me. Brav an amzer, splann an heol, yac'h an avel. Yen ar mor memestra, n'eus ket anv da neunvial. Bale a-hed an draezhenn divent, sellet ouzh an Alamaned o rouzañ, ne lavaran ket. Ha mont gant ar marc'houarn e rouantelezh ar velo.

Morse ne vez re ziwezhat

Paotrigoù, evidoc'h eo ar re zu hag ar re ruz. Hag evidoc'h plac'higoù  ez eus ar re roz hag ar re wenn (ha roz).

E Decathlon on en em gavet gant an diskouezadeg-mañ eus veloioù evit ar vugale. Hag e Bro Danmark em boa gwelet hevelep tra. Livioù kreñv d'ar baotred ha livioù flouroc'h d'ar merc'hed.

E Bro Danmark ouzhpenn ne oamp ket deuet a-benn da gavout ur c'hoariell Lego a-feson evit hor plac'hig vihan, daou vloaz dezhi. Bon, ni an hini a gave deomp ne oant ket a-feson rak, gwela pezh a zo, he deus plijadur o c'hoari gant re he breur. Memestra e vez lavaret :  biskoaz n'eo deuet Lego a-benn d'ober berzh gant ar plac'hed.

Mad eo deomp memestra pa emañ IKEA oc'h ober an traoù evel 'zo dleet. Ouzh dor privezhioù ar baotred 'm eus bet gwelet ar skritell-mañ, heñvel ouzh hini bet lakaet ouzh dor privezhioù ar merc'hed :

Hag e-barzh ez eo gwenn an dafar d'ober war-dro ar babigoù :-)

Ma ! Ma ne vefe ket roet skouer vat deomp war an dachenn-se gant an dud eus Bro Suede e vefemp dipitet evel-just :-)

Kalz pouesusoc'h eget an internet

En ur bourmen war Gae an Tournelle e Pariz e oan. Erru war ar blasennig-mañ, on en em gavet gant an dra-se.

Da gentañ e kave din e oa paotred ar c'hanioù-skarzh o labour aze dindan douar. O sellet a-dostoc'h, ne oan ket sur ken. Da betra e oa bet lakaet an teir fun-se ? Tri faotr a oa e-kichen o fardañ traoù. Hag unan anezho o tont d'am gaout. Ha me d'ober goap :

- Petra emaoc'h oc'h ober ? Kas oksijenn e-barzh ?

- O lakaat ar fibrennoù optikel emaomp. Klevet hoc'h eus diwar o fenn moarvat ?

'M eus ket amzer da respont, ma teu un den taer e zoare :

- Ne chomo ket an dra-se amañ ? emezañ, en ur ziskouez ar glouedig. Hag eñ ostiz an davarn o tigeriñ e stal. War-nes lakaat an taolioù hag ar c'hadorioù war riblenn ar straed emañ.

- Emañ an den-se o tegas an internet tizh braz deoc'h, emezon-me

- Traoù zo a zo kalz pouezusoc'h eget an internet ! eme unan bennak o tont eus a-dreñv ma c'hein, neuz taer warnañ ivez ha doare dezhañ bezañ breur d'egile.

Sabatuet an tamm ac'hanon, e kav din ne vefe ket brav din toullañ kaoz. Setu eñ o telc'her warnon :

- Ar c'hengreadur! Se 'zo kalz pouezusoc'h ! Ne gav ket deoc'h ?

E-keit-se e ya ar gaoz etre paotr ar fibrennoù optikel hag an ostiz:

- Kemennet e oac'h bet, eme an eil

- Ne oa ket lavaret e vefe evel-se. M'am bije gouezet em bije lavaret d'am c'hoskor chom er gêr.

Mont a ran gant ar c'hazh da c'horren ma fri ouzh labour an daou baotr all doare dezho kempenn ar fibrennoù. Unan a gav din un tamm, ur milimetr e ziametr, ur pemp neudenn e-barzh.

- Pegement e kasit e-barzh ?

- 100 MB

Trugarekaat a ran ha sachañ ma skasoù

Ur pennadig goude e teu ar raneller zo ac'hanon en-dro war-hed taol d'ober ur sell a-guzh. Deuet an ostiz a-benn da gas kuit ar glouedig diwar dro e leurenn. Hag eñ o lakaat taol ha kadorioù en he flas. Prest eo an traoù da zegemer mat an douristed !

Droug o deus an Alamaned ouzh ar C'hresianed ? N'on ket sur !

Añjela Merkel a zo aet an tu-gounit diganti  er Bundesrat. Gant an tu kleiz eo aet ar maout e dilennadeg parlamant Nordrhein-Westfalen (NRW) disul.  A-hervez e vefe drouklaouen an Alamaned abalamour ma asant o "C'hanzlerin" e vo roet sikour da Vro C'hres.

Dre zegouezh e oamp ehanet ma gwreg ha me e NRW digwener da noz o tont eus Bro Danmark. En Eschweiler edo hol leti. Ha ni o vont da glask un davarn da zebriñ koan. War blasenn an iliz en em gavjomp gant ur c'hant a dud en o sav dirak un ostaleri. Hag int o flapiñ hag oc'h evañ o banne .

Ul leurennig a oa bet savet ivez da c'hortoz prezegerien. Warni skeudenn ur paotr yaouank o vont war ar renk gant ar SPD.

E-barzh an davarn, azezet ouzh un daol, un dornad tud war e dro, edo ar paotr. Komzet e oa moarvat eus ar pezh da lavaret tuchantik war al leurennig. Pennoù bras ar parti a oa deuet d'e skoazellañ. Unan anezho am eus gwelet kent er skinwel. Kanad Europa eo marteze.

Evit reiñ skoaz da Vro C'hres, n'on ket sur eo an dra-se a-enep grad vat an dud a welemp . Rak Grek eo an davarn e oant oc'h evañ he bier. Hag al lec'h-se a blij dezho war a seblant. Daoust d'an dister a oa blaz ar mousaka bet debret ganeomp!

Hawai yen pe ar vuhez war-lerc'h ar besketaerezh

N'eo ket echu ar goañv c'hoazh, hervez ar meteo. Hag er mor Baltik e oa listri dalc'het a-nevez zo gant ar skorn. Bez ez eus tud koulskoude hag a zo doare dezho bezañ en o butun ouzh ar riv. Ha darn o surfiñ daoust d'an amzer-se. Estlammet an tamm senior ac'hanon o paouez bezañ dalc'het en e di gant ar waskenn barpagn e-pad ur miz hanter !

Klikit amañ da welet an doareoù e Klitmøller, kêr war an aod e Bro Danmark an Hanternoz.

Amañ dindan e c'hellit digeriñ ar fotoioù gant pep a destenn bet troet e brezhoneg

E Klitmøller, kêr mor an hanternoz, ez eo krog tud yaouank desket da ziazezañ. Savadurioù nevez hag intrudu a zifluk eus an traezh tra ma gresk ar gêriadenn, hag hi an hini nemetañ a ra er c'horn-bro. Unan e penn-pellañ Danmark, enlouc'het warnañ skolioù bet serret, stalioù aet da get ha kêrioù o koazhañ. Kregiñ en deus graet an diorren positiv gant ur strollad surferion.

foto1 Foto: Kristine Kiilerich

An Hollandad Sjoerd Kok en deus dilojet da gKlitmøller c'hwec'h vloaz hanter 'zo. E vakañsoù e kêr e oa bet meur a wech ha dedennet e oa gant an doareoù distenn hag ar surf digor bloaz-pad.

foto2 Foto: Kristine Kiilerich

En ur ober pemp bloaz ez eus bet savet 50 ti nevez en douar traezh e kêr an aod e 825 annezad.

foto3 Foto: Kristine Kiilerich

An "ti-mission" kozh zo bet lakaet da genvurev krouiñ gant tud o labourat gant an design grafek, al luc'hskeudenniñ hag ar merañ raktresoù.

foto4 Foto: Kristine Kiilerich

Ouzhpenn surferien a ziviz dilojañ da gKlitmøller. Martin Eigenbroth en deus divizet sevel tiegezh e Klitmøller, peogwir ez eus tro da gaout levezon war intrudu ar c'horn-bro ha da emouestlañ d'ar c'hevredigezhioù niverus e kêr.

foto5 Foto: Kristine Kiilerich

« Eus un deiz d'un all e tilezas ar besketaerezh Klitmøller. Un deiz heverk e oa ken e oa, pa zizouaras ar bigi kuit diouzh kêr hag e chomjomp gant ur porzh-pesketa goullo ha nec'hamant "betek an divskouarn". An dra nemetañ hon doa amañ e oa ar besketaerezh » a gont  Peter Sand Mortensen

foto6 Foto: Kristine Kiilerich
 
Ezel ti-klub pesketaerezh amatour Klitmøller eo an darn vrasañ eus ar besketaerien gozh a vicher. Pa oa degouezhet ar surferien er bloavezhioù 1980 meur a hini a oa amgredik. « E-pad un nebeud bloavezhioù hon eus sellet a-gorn an eil re ouzh ar re all. A-greiz-holl o doa kroget da brenañ an tier a oa chomet goullo. Adnevezet o deus bet anezho ha savet re nevez. Hag ur bern bugale zo deut ivez. »

foto7 Foto: Kristine Kiilerich

Savadurioù bet dilezet gant ar besketaerezh a vicher a zo bremañ e kerz klub ar besketaerien amatour

foto8 Foto: Kristine Kiilerich

Emañ Klitmøller e NorzhJylland war lez ar brasañ terouer natur miret e Bro Danmark : Handsted-reservatet.

foto9 Foto: Kristine Kiilerich

Hervez rakwel poblañs kumun Thisted e kresko niver ar vugale e Klitmøller hag en ur gêr all nemeti er c'humun.

foto10 Foto: Kristine Kiilerich

Sikouret eo Peter Steinfath, 13 vloaz dezhañ, da wiskañ e wiskamant-surfiñ goañv gant e vreur henañ Casper.

foto11 Foto: Kristine Kiilerich

Meur a wezh bep sizhun emañ Peter Steinfath, 13 vloaz dezhañ, er-maez war ar gwagennoù.

foto12 Foto: Kristine Kiilerich

Surferien ha re all a zibab anneziñ e Klitmøller. Laurids Mortensen, a labour gant diorren an takad, a gav dezhañ n'eo ket evit an doareoù surfiñ hepken. Klitmøller a sav dreist gant ar c'hreñv m'eo he c'humuniezh hag ar youl ez eus eno da zont a-benn eus an traoù.

Ur brav a hironiñ !

E-kichen kroashent-tro Alesia emaon, o vont da di ar re glañv. En ur zont er-maez eus ehan-lec'h an tren-buzug e taolan ur sell tro-dro din da gavout an davarn glouer ma vo debret meren enni ganin. E kuzh a-dreñv an Hipopotamus emañ.

Brav ar sal. Na modern na kozh. Propr ha net memestra. Tomm livioù al lambruskoù ouzh ar mogerioù. Chichant ken ez eo an ostizez a-dreñv an daol-evañ. Mousc'hoarzh tout e tiskouez ma flas din eno. En ur sell ouzh meuz an devezh, "silzig eus Bro Auvergne", e kav din emaon en unan eus an tavarnioù dalc'het gant hor mignoned eus kreiz Bro C'hall. Hag int ken stank e Pariz.

Pa tostaan ouzh ar c'hef e welan ez eo kinklet gant un dornad pegsunioù : "Stade Rennais", "Saint-Malo" ... hag "Aurillac" ...
"Doare d'an ti-mañ da vezañ liammet ouzh Breizh." emezon d'an ostizez, hag hi, mousc'hoarzh tout adarre, lentig marteze, ne lavar ger.
En ur vont kuit e welan kartenn gozh hor bro a-istribilh ouzh ar voger. Hag ur skritell a-us dezhi : "Grit plijadur da Vro Normandi, debrit istr"

Eus al lennegezh da vuhez ar gevredigezh

Echu on lenn "ur Breizhad oc'h adkavout Breizh" a-benn ar fin. Lavaret 'm eus bet dija ez eus magadur fonnus d'ar spered e-barzh al levr-se.

Meur a rannad eus sevenadur ur bobl a zo studiet : al lennegezh, ar c'hoariva, ar yezh, an istor ... ha me oar me ...Re liesseurt an danvez d'ober ur c'hrennad anezhañ.

A-hed ar pemp bloaz ma oa skrivet ar pennadoù bet embannet eo bet kemmet krenn gant Roparz Hemon e respont d'ar goulenn-mañ : dre be hent dihuniñ Broad Vreizh ? Setu pezh a lavar a-zivout-se :

"Pa'm eus savet « Gwalarn » e kave din ne oa nemet un dra hepken a rae diouer d'ar brezhoneg : ul lennegezh. Ma vije roet da Vreizh ul lennegezh vras en he yezh, e teuje buan, a greden, d'he c'harout ha d'he azaoueziñ, ha lakaat ar yezh en he sav-plom ne vije nemet ur c'hoari. Klaskomp sevel ul lennegezh, hag ar peurrest a vo tizhet hep poan na tregas."

Ya ! Met hep buhez, lennegezh ebet :

"Ar vuhez a dle magañ al lennegezh. Hogen peseurt lennegezh a c'hell diwanañ e-lec'h n'eus ket a vuhez ? Brav eo krouiñ ul lennegezh, hogen bravoc'h ha retoc'h krouiñ ur vuhez. Hag hep yezh dereat, hep deskadurezh, hep emskiant vroadel, peseurt buhez a c'hell bezañ en ur vro ?"

Setu dirazañ e labour en dazont :

"N'em eus ket ezhomm ... lavarout e vin mui-ouzh-mui dalc'het gant al labour kevredigezhel, a gemero mui-­ouzh-mui a lec'h marteze e « Gwalarn ». Betek an deiz ma vo medet eost kentañ hor striv : ma vo krouet e Breizh ur vuhez speredel, ma kellido diwarni ul lennegezh nevez, disheñvel diouzh an hini a vennen e 1925 kenframmañ en un taol, talvoudusoc'h hep mar, daoust na vo ket bravoc'h."

E 1930 e oa bet skrivet al linennoù-se. Adembannet int bet gant Roparz Hemon e-unan e 1972, pa oa en e 72 vloaz. N'ouzon ket hag en deus lavaret e meno diwar-benn ur pal ken diaes da dizhout pa oa aet kozh. En ul lizher en doa skrivet da Vaodez Glandour pa oa tost da fin e vuhez e lavare koulskoude :

"Tud yaouank e-leizh a studi ar brezhoneg bremañ. Hep mar, lod anezho da vihanañ a zalc'ho"

Ha war-lerc'h ar binvidigezh ?

Emaon o lenn "Ur Breizhad oc'h adkavout Breizh" gant Roparz Hemon. (*) Unan eus ar pennadoù eo "Ar vroadelezh hag ar stad" e ditl. P'emañ Sarkozy o klask kas en dro an diviz diwar-benn identitelezh broad Frañs, setu me lakaet ranell.

Hervez RH ar stad a zo he fal kentañ derc'hel ar galloud. Rak-se he devez ezhomm atav un dra bennak da vodañ an dud dindan he beli. Pa ned a ket ur meizad en-dro ken e vez kemeret unan all ganti.

Setu un tammig eus pezh a lavar Roparz Hemon :

"Ar Rener, ar rummad-rouanez, setu kreizenn ar Stad gwechall ; ar Rener hervez al Lezenn, ar Rener hervez Doue, ma c'halle en em vodañ en-dro dezhañ pobloù disheñvel hep bezañ e riskl da goll o broadelezh... Ha mar deus e-barzh ar Stad un elfenn all a unvaniezh, n'eo ket ar vroadelezh eo, hogen kentoc'h ar Gredenn.

...

E dibenn an triwec'hvet kantved, gant derou beli ar bobl, emañ lakaet ar vroadelezh da ziazez ar Stad. Er Stadoù-Unanet, e Bro-C'hall da gentañ. Un tamm dre-holl goude se.

...

Ezhommoù ar C'henwerzh hag an Ijinerezh : Pinvidigezh. Sklaeroc'h-sklaerañ e teu bemdez e vo ger-stur nevez ar Stad. Adal ar c'hantved diwezhañ emeur douget da anavezout pouez ar Binvidigezh war vuhez an den hag ar Stadoù.

...

Ne voe nemet tamm-ha-tamm ma teuas e penn un nebeut tud e c'halle ur Stad bevañ hep d'an holl annezerien kaout un hevelep Kredenn.

...

Ken diaes all da veizañ ha m'eo hiziv dimp meizañ e c'hell tud o komz yezhoù disheñvel, bevañ  kichen-ha-kichen ha kenlabourat da vererezh ar Stad

... en hevelep doare ma voe Dihun ar Feiz, da amzer an Disivoud, pennabeg da zisrannerezh ar Stad diouzh ar Gredenn, goude bezañ startaet evit ur mare o liammoù, e vo, gwirheñvel eo, Dihun ar Vroadelezh en naontekvet kantved, goude bezañ startaet al liammoù etre ar Vroadelezh hag ar Stad, pennabeg d'o disrannerezh."

Hep mar na marteze eo mennet stad-vroad-Frañs da blediñ muioc'h-mui gant hor "pinvidigezh". Ha setu ar G20 ivez oc'h ober dreist-holl war-dro an ekonomiezh.  Gwelet eo ivez eo mennet Barack Obama  d'ober da ouarnamant Stadoù-Unanet plediñ gant arc'hantiñ yec'hed an Amerikaned.

E Kopenhag e oa dalc'het ken start  stadoù zo gant preder an armerzh ken n'o doa ket graet war dro hini nevez an endro evel ma vije dleet dezho.

 (*) Ur renabl eus pennadoù bet skrivet gantañ er bloavezhioù 25-30 e "Breiz Atao" pe "Gwalarn" eo.
Dastumet int bet en ul levr bet embannet e 1972 gant Al Liamm. Boued spered e-leizh ez eus e-barzh. Brav e vije bezañ bremañ un hevelep soñjour hag a skrivje en hor yezh.