blogyann

Grenen (ar barr)

Monet a ra an dud niverus d'e welet èl ma raont en hor bro evit Beg ar Raz.

Penn pellañ Bro Danmark en hanter-noz eo e-lec'h Penn ar Bed. Traezh a zo e-lec'h gran-maen.

"Grenen" a ra an Daniz anezhañ. Ur ger hag a dalv kement ha "barr ur wezenn".

(Trugarez da Erik Christensen)

Ema ret d'an douristed lezel o c'hirri er parking ur c'hilometr a-raog. Hag int àr droad dre an tevenn hag hed-a-hed d'an draezhenn. Ar re n'o deus ket c'hoant da vale pe n'hellont ket a vez douget en ur seurt bus tennet get un trakteur, a vez graet "morvuzhug"(*) anezhoñ.

(Trugarez da Alan Gore)

E welet steudad ar gerzhourion e soñjan e perc'hindourion. Daniz a ziskouezh bout al lod vrasañ anezhe. "Amañ emañ penn-pellañ hor bro" e soñjont a dra sur a pa raont un tamm arsav àr vegig an draezhenn.

 

(trugarez da milehuset)

Et c'hornad-bro-mañ en-dro da Gêr Skagen, er blevezhioù 1900, e oa tolpet livourion hag a zo daet da voud brudet mat. Lod ag o zaolennoù a zo bet livet àr an draezhenn-mañ. Honnezh en o zouez:

(Krøyer : goubannwel en hañv, trugarez da Mia Felgelson )

Meur a hani ag ar livourion-se a oa bet e Bro-C'hall é klask brud. Hag int ivez e Breizh a oa anavet en o mesk d'ar c'houlz-se. Setu-ni é welet un daolenn bennak ag hor bro-ni, a gostez Cancale, en diskouezadeg mirdi Skagen. N'heller ket o gwelet àr al lec'hienn siwazh.

(*) arenicola marina pe " ver de sable ". Sandormen e daneg.

Bec'h d'ar postoù-gouloù !

Diriaou ar sizhun a zeu e vo votadeg e Bro Danmark. Anvet e vo ar Folketing evel ma vez graet eus ar parlamant eno. Setu ma vez lakaet poltredoù eus ar re war ar renk war wel e pep lec'h. E Frañs e vezont peget ouzh mogerioù. Er vro-mañ e vezont staget ouzh ar postoù-gouloù. Emañ an daou-mañ e-kichen aerborzh Kopenhag. Ha gwelet 'm eus re ar plac'h ouzh kasi pep post war ar straed. D'ober un tamm barzhoniezh e ro tro a-wechoù : glaz ha ruz eo livioù an dou du.

Ar minister kentañ an hini a zibab deiziad ar voterezh. Evel e Breizh-Veur. A-greiz-holl e vez kemennet. Ha neuze bec'h d'ar postoù! Da dapout ar re a zo darempred en o zro. Pa ne vez ket plas a-walc'h, koulskoude, e vez lakaet poltredoù eus meur a zen war ar memes post. Red d'an den pignat neuze.

 

Dek ali mat d'an droadeien

Al listenn-mañ zo bet savet gant kevredigezh an droadeien(*) eus Bro-Danmark, studiet ganti ar gwall zarvoudoù maz eus bet lazhet troadeien.

1) Kerzhit gant ribloù an hentoù... Paz eus anezhe.

2) ... Petramant kerzhit gant tuioù kleiz an hentoù.

3) Un tamm fluo pe ur c'houlaouenn a vo ganeoc'h pa vezo teñval.

4) Arabat mont a-drek ar gweturajoù o vont war a-dreñv.

5) Arabat dont war an hentoù ken na vo aet kuit ar busoù.

6) Bezit war evezh en treuzennoù-troadeg.

7) Diwallit ouzh ar c'hirri-boutin hag ouzh ar c'hirri-samm dreist-holl.

8) Arabat dont war an hentoù d'ar red.

9) Mard oc'h senior emaoc'h muioc'h war var.

10) Deskit reolennoù an tremenerezh d'ho pugale. Bezit c'hwi hoc'h-unan ur skouer vat.

E Bro-Danmark e ra ar re zo war o leve 1/3 eus ar re lazhet. 66% eus ar gwall zarvoudoù a zegouezh en hanter-vloaz ar goañv.

(*) ar re a ya war droad.

Warc'hoazh 'ma Nedeleg

Warc'hoazh 'ma Nedeleg! Paotred, kerzhit buan
Da gerc'hat un etev, ma vo lakaet en tan.
Atav kef Nedeleg en deus un nerzh dispar
Da gas diwar hon tro an enkrez, ar glac'har.

(Skouerien Kristen, meneget gant René Le Gléau)

Ar chas daonet ... nemet e vefe o mistri

O vont emaoc'h gant ribl ar ruioù abaoe ur pennad mat hag arru sanket don en ho soñjoù, luskellet maz oc'h gant ho pale.  A-greiz-holl oc'h dishorellet gant harzhadenn ur c'hi o tarzhañ a-ziadreñv kloued ul liorzh pe brenestr un ti.  Ha tapet krog ennoc'h fulor ha c'hoant da frikañ al loen.

Hag ur pennadig goude e teu d'ho spered n'eo ket eñ a zo kaoz. E vistri an hini o deus lakaet anezhañ amañ hag eñ desavet fall ganto. Nemet e vefent laouen e vo harzhet gantañ ouzh kement den o tremen e-biou d'o zi.

Ha pa viot oc'h ober ho tro-bale war ar maez gant ho MTB (marc'h-houarn treuz bro) e vo redet war ho lerc'h evel pa vijec'h paotr al lizheroù ! Un deiz ma oan oc'h ober ma zro dre wenojennoù Sant Filberzh ha m'em boa bet aon e yafe kof ma gar gant ur penn tign, e oan en em gavet gant ur MTBour eus ar vro :
- meur a wech hon devez d'ober gant ar seurt-se, emezañ
- ha petra vez graet ganeoc'h neuze ?
- ni a youc'h uheloc'h egeto !
Un deiz all e oan e korn-bro Lyon,  gant ma mab. Ha ni o vont dre ar maezioù gant hor c'hKTB. A-greiz hon tro-vale e lavar din :
- un tammig pelloc'h, en deiz all, e oa bet stanket ma hent din gant daou c'hi. Hag int o harzhal ouzhin betek ma voent galvet gant o ferc'henn. Mar karez e vo aet gant ur wenojenn all.
Ha me n'em eus ket c'hoant da ziskouez d'am mab e vijen aonik, evel-just. Setu ni harzet dizale gant ar chas. A-geñver d'ur greizenn-gezeg emaomp.  Gortoz a reomp, hon troad war an douar. A-benn ur vunutenn bennak ez eont kuit. Seurt zo a gav dezho o deus droed da harzañ an dreminidi war a seblant !

Ba Jules Gros benniget e vez lavaret : "ar chas na harzhont ket a grog"! Daoust hag e c'heller lavaret ivez : "ar chas a harzh ne grogont ket" ?

N'eo ket evel-se e pep lec'h. Bet e oan gant tro-vale tud Tro Breiz e Bro Gembre. Arru oa diwezh hon tro hag ur paotr o lavaret :
- setu-ni n'hon eus klevet harzhadenn digant ki ebet c'hoazh. Pezh zo ken torr-revr e Breizh.

A-wechoù e vez tud chichant e-touez perc'henned ar seurt chas memestra. Soñj 'm eus eus amezeien a oa o c'hi o harzhal a veure da noz, bemdez Doue. E greanterezh an eoul maen e oa ar gwaz o labour. En estrenvro e oant bet o chom en ul lec'h ma ne oa ket gwall vat an diogel. Hag int deuet en-dro e Frañs gant ar c'hi o doa bet eno. Hag hennezh da gendelc'her gant e vicher a viskoaz. Gant ar gordenn e oa staget outi n'halle ket mont betek garzh al liorzh. Ur metr a chome, plas awalc'h d'ar chas all da dremen a-rez d'e fri. Kalzik anezho a dlefe mont e giz-se rak treset mat e oa ar wenojenn ganto !

edificio bretagne

Kavet an toullad skeudennoù-mañ en ur surfañ war Flickr. Eus un ti e Sao Paolo ez eus anv war a seblant. Hag eñ interesant ar savouriez anezhañ. Bretagne a vez graet dioutañ. Marteze ez ouzit Portugaleg hag e roiot deomp da gompren an istor.

Le Père éternel

Pa oan bihanig, 4-5 bloaz din, e dibenn an eil brezel bed, e oan bet o chom e Kêr An Alre. Eno e oa ma zud o c'hortoz Kêr An Oriant digor. War an dosenn a-dal da Borzh Goustan, e-kichen kouent "le Père éternel", en ti a vez graet dezhañ "le Petit Château", e oa hor rann-di. Da skol-vamm ledanezed ar gouent ez aen.

Ha me bremañ, pa zeuan d'An Alre, o klenkañ ma c'harr alies er parking e-tal chapel ar gouent. Sachet ma evezh gant ur skritellad ouzh moger homañ  hag a lavar : amañ oa roet lañs da urzh frered ar skolioù kristen ur c'hantved  hanter zo. Savet din ar c'hoant da visitañ ha serr nor ar chapel bewezh.

Betek ma oa kiniget gweladeg chapelioù Bro An Alre gant ti an douristelezh. Ha me o vont pa oa erru tro chapel ar "Père Éternel."
Ur seurt sal vras eo, savet e-barzh ti-bras ar gouent (er penn pellañ al luc'hskeudenn). Da dennañ selloù eo ar c'hadorioù-chantele, un tregont pe zaou-ugent anezho, bet skizellet gant frered  Chartreuse an Alre, e penn all da gêr.

Ul ledanez kozh a oa eno, interesus he displegadennoù. N'emañ ket hec'h urzh o ren skolioù ken. En tud laik int fiziet :
"Ni a ro lañs d'an traoù, emezi, ha pa vezont o vont en dro, e klaskomp tud  hag a ray war o zro."
Deut en-dro da di ma mamm e Kêr an Oriant, em boa kontet dezhi.
"C'hwi ne blije ket deoc'h mont  d'ar skol-vamm" emezi "Lavaret ho poa din" :
« Ne fell ket din mont d'ar skol ken, mamm, bet on bet staget ouzh ar bank gant seur Hélène !»
"War ar maez  e oac'h bet pell o chom" eme ma mamm c'hoazh "ha ne vezec'h ket evit chomel en ho plas !"

Yezh ur ouenn

Da betra a dalv ur yezh vihan ? Lennet 'm eus an arroudenn-mañ en ur romant e Daneg. Un tammig dic'hortoz e oa din ar pezh a lavar ar skrivagner. Marteze e talve ar Brezhoneg d'un dra heñvel gwechall.

An Daniz ez eus anezho ur ouenn vihan er penn pellañ eus ar bed anavezet. Arouez boutin o gouenn eo o yezh. Dre o yezh eo en em anavezont an Daniz. An estranjourien a gomz gant pouezioù-mouezh. Ar gwir Daniz gant rannyezhoù. En em anavezout a reont dre arlivioù tregasus fals-mousfent o yezh-vamm. En em weleadiñ an eil egile a reont dre arlivioù didroapl ar yezh. Hag int douget gant ur meizerezh hag ur mousfent boutin roet da glevet.
(Leif Davidsen
Lime's billede)

Lakaat a ran an destenn danek ivez pellikoc'h bete gouzout e teufe unan bennak hag a oar ar yezhig-se :-)

donezonet-kaer evit ar speredelezh ?

Klevet e oa bet ganin an aotrou rabin Josy Eisenberg, anezhañ e karg eus an abadennoù TV yudev, o lavaret : "Gouzout a ouzon bremañ perak e oa bet dilennet Pobl Israel. Kavout a rae da Zoue en doa ar bed ezhomm ag ur bobl hag a vefe barrek war ar speredelezh anezhi". Trubuilhet an tamm anezhañ e oa an ao. rabin marteze o soñjal e politik Israel.

diwezh ebet

Bet on bet o tremen en devezh e gouel etrebroadel al levr hag ar film Sant-Malo, graet "Beajourien Souezhus" anezhañ ("étonnants voyageurs"). Selaouet ur brezegenn gant Atiq Rahimi, skrivagner ha film-aozer anezhañ, ganet en Afganistan ha deuet da vezañ repuad politik e Frañs.

Un desenn doktorlezh zo bet tremenet gantañ e skol-veur Rouen. Diwezh ar filmoù a oa an danvez anezhi. Souezhus awalc'h evel ma tere ouzh ar gouel-mañ
.
Un diforc'h bras ez eus etre ar C'hornog hag ar Reter evit ar pezh a sell ouzh diwezh an istorioù, koñchoù, filmoù ... Er C'hornog eo ret bezañ un diwezh. Ret d'an istor heñchañ an den en ul lec'h, stad ... resis bennak pe zegas ur gentel gantañ...
Disheñvel eo e sevenadurioù eus ar Reter, hervez Rahimi. N'eus diwezh ebet gant un istor. Ma vefe  goulennet digant ur c'honter petra eo ar gentel e vefe respontet gantañ : " ez an da gontañ un istor all deoc'h". Ha setu ni degaset da "un noz ha mil".